البنات الغزلات

كان يا مكان في قديم الزمان إلا في ثلاث بنات غزالات بغزلوا وبتروح البنت الزغيره بتبيع الغزيل، وبتجّيب كل اشي بحتاجو لمّا بزيد تعريفه ولا قرش، بتجيب فيه شويّة لحمه لبستها، وبستّها بتعرفها وبتلاقيها من نصّ الطريق. وضّلت على هالحال. يوم من الأيام بستّها بتلاقيهاش ابتوصل برضه بتلاقيهاش، آه وبعدين بدور عليها بتسأل خواتها بقولولها ابنعرفش، عاد هم بكونوا كبّوا البسه في بيت الغول. ابتسمع صوت البسّه بقولولها خواتها انزلي طوليها، هي البسّه شوي. انزليلها تحت ابتنزل، بدّها اطولها ابتعرفش تطلع لما تطلع. لمّا تطلع ، لمّا ابتعرفش، بفرحوا خواتها، لكن هي ابتحزن ابتحزن حزن، هي ما بتقدر تتحمله، لكن شويّ إلا الغوله جايه هي بتروح تتخبّى تحت طاوله الغوله بتشّم ريحة انس بتقول إذا بنت بنتي، وإذا ولد ابني، وإذا عجوز امّي، وإذا ابويّ بتقلّها أنا، أنا بتقلّها انت بنتي بعهد الله والخاين يخونه الله، خذي هي أعطيتك تسعة وثلاثين مفتاح، والمفتاح الأربعين أوعك أوعك تفتحي الغرفه الأربعين لأحسن باكلك، قالتلها: خلص يمّه ابدا مش ممكن افتحها هادي روح يا يوم تع يا يوم. يوم من الأيام ابتطلع في راسها، تفتح الغرفه، اتقولي الغوله بتروح تقلّها أنا اليوم رايح ورا الدار، عاد هي لمّا اتقول ورا الدار، بتكون راحت بعيد، البنت بتخليّها طلعت من هين، وبتروح تفطر وتلبس وبطول المفاتيح، وبتجربّهم لحد ما تفتح الباب، شو بتلاقي بالغرفه بنت شقره شقره ومعلقه من جدايلها وتحتها بركة دم، هادي بتروح بتحملها وبطميها وبتشربها، وبتقلّها اريحك ساعة زمان علشان ارجع أربطك مثل ما كانت قبل ما تيجي لحسن تعرف وهي البنت بتتريّح تخرفها قصتها، ان الغوله هادي أكلت كل أهلها وهي عشان حلوه ربطتها بعد ما خلص الوقت بتروح تربطها مثل ما كنت وهي طالعه بتقول  ايه شو هاده، وبتحطّ ايدها في بركة الدّم، بتطلع ايدها، دهب بتقول يا وردي شو أعمل، شو أسوي، شو بدّي أقلها لمّا تيجي بتروح ابتمسك بلطه وبتقطّع اصابعها بسير الدم بنزل مثل النافوره، بتلقط أصابعها وبتعصّب ايدها اتقولي بميت شريطة أول اشي من الخوف، وتاني اشي من الوجع بتيجي الغوله ابتفتحلها الباب بتشوفها مريضه مش قادرة بتقلّها مالك، بتقلّها لا اشي ابتقلّها قولي مالك بتقولها ولا اشي بتمسك ايدها وبتقلّها مال ايدك، بتقلّها هيك هيك بتقلها طيب المرّة سماح، لكن المرّه الجايّ إذا عملتيها والله بخلّي الدبان يسمع قرقشة اعظامك، قالتلها: طيّب. قالتلها: روحي افتحي الغرفه وحطّي ايدك فيها مرة ثانيه علشان ترجع مثل ما كانت بتروح ابتعمل مثل ما ابتقلّها، برجعوا اصابعها زيّ ما كانوا. بتقلّها اصحك اتعيديها ثاني مرّه اصحك، قالتلها: طيّب خلص روح يا يوم تع يا يوم بتفكر البنت بتروح بتفتح الغرفه وبتحمل البنت وبتنزلّها وبتعطيها لبس ازلام وهي ابتلبس لبس زلام وبتركب كل واحدة فيهم فرس، وبوقفوا على مفرق طريق بتقلّها أنا من هادي الطريق وانت من هادي، بروحوا ابتمشي ابتمشي لحدّ ما توصل دار هالوزير ابتنزل عن الفرس وبتطلع عندهم وابتشلح بشوفها ابن الوزير بقول الله شوهاده يا سلام ما أحلاها سبحان الله العظيم كاين يخلق وتمهل بطلب منها ان ابن الوزير بتجوزّها بتوافق المهم بتم الفرح يوم ورا يوم، شهر ورا شهر بتسير بدها تولد. هادي الغوله بعد ما بتركوها ابتفتح بتخت الرمل وبتشوفها وين راحت بضّل صابره عليها لعند ما تولد بتلبس مدني، وبتحط غطا على وجهها، وبتحمل شنته وبتمشي تحت الدار هاده ابن الوزير بنزل مستعجل بتقلّه وين رايح، بقلّها مرتي بدّها تولد، ونازل اجبيلها دايه قالتله: أنا دايه بزاتي، قالها: طيب جابك الله واجيتي طلعت قالتله وينها، قالها: هيها في الغرفه هادي، ولقيت خواته وأمه حواليها، قالتلهم كلكم ابتطلعوا برّه ولا وحده تضّل قالولها خوات الولد آه شو هادي مرة اخونا ولازم انضل عندها، قالتلهم ابدا بتقولي طلعوا ضلّت امه قالتلها: وانت كمان برّه قالتلها: مش ممكن يي انا امه وهاده أول ولد الي ، ولازم احضر ميلاد مرته قالتلها: يا بتركها يا بتطلعوا برّه قالتلها: ابنطلع بطلعوا وبتسكر الباب وراهم وبتكشف عن وجهها الغطا، بتبحّر فيها بتقلّها هيك عملتيها طيب معلش قالتلها: يمه بعرضك دخيلك أنا اخطيت سامحيني قالتلها : طيّب المهم بتولدها وبتاخذ الولد وبتحطّ بداله حجر وبتحمله وبتحطّه في الشنته وبتطلع بتقلّهم جابت حجر آه والله مرة السلطان بتجيب حجر، لكن هو بفوت عليها بقلّها معلش متزعليش المره هادي. العمر طويل وانشا الله الله يعطيك العمر وبتجبيلنا وهناها وراح الولد عشان اتربيه الغوله بترد ابتحمل كمان مرّه ابتعمل فيها نفس الاشي بتاخذ البنت ابتحطّلها بداله كلب بقول ابن السلطان آه باين عليه طويله مرّه كلب ومرّه حجر لازم اتجوز. بروح بخطب هالبنت وبعملوا املاك وبيجي دور العرس.

يوم العرس بتروح الغوله بتلبس الولاد احلى الأواعي وبتلبس هي وتاخذ الولاد بكون عمر الواحد منهم أربع خمس سنين، وتلبس وبتغطّي وجهها وبتقعد بآخر الغرفه اللي فيها العرس ، بيجي العريس والعروس بقعدوا شو بتقول العروس، بدّي اشرب بتروح يجيبولها ميّ بتقول البنت بدّي اشرب أنا بقولوا الناس شو البنت الصغيره تشرب قبل العروس لا والله ما بسير أعوذ بالله بقلّهم العريس شربوها قبل ما اشربوها بتقول البنت الدار دار أبونا وأجو الغرب يطحونا، وإذا مش مصدّقين هادي علامة أبونا وبطول محرمه من جيبتها بسمع ابن السلطان بقول آه شو هاده الكلام، اقولي بمرق الوقت عشر دقايق، وبقول بدّي اشرب، بقول الولد أنا بدّي أشرب سيروا يقولوا ايه مش لازم يشرب قبل ابن السلطان أعطي الولد شرب بقلّهم قبل ما يشرب الولد بقول الدار دار أبونا وأجو الغرب يطحونا، وان مش مصدّقين هادي علامة أبونا وبطول محرمه من جيبته بفهم ابن السلطان بنزل عن اللوج وبحمل الولاد هم يسيروا يقولوله، انت أبونا وهم ايش خصّهم فينا، بفرح الملك بولاده وشو بطير فيهم من الفرح، بقول انهوا العرس، رجعّوا العروس لأهلها وجيبوا ام الولاد مرته العتيقه بصمدّوها بدال العروس، وبغنّوا وبنبسطوا بتسير بدال العرس واحد، العرس بعرسين، عرس رجوع الولاد لأمهم وأبوهم وعرس ابن السلطان على مرته، وبعيشوا في سعاده وهداة بال، والغوله بترجع لكن بتروح أم الولاد انت أمي وأنا وين بدّي اروح من كل هالمعروف اللي عملتيه معي، قالتلها الله ما بضيع تعب حد، قالتلها عيشي معانا، قالتلها ابدا انت عارفه اني أنا غوله مش ممكن يحصل وبتروح الغوله على بيتها.

وتوتو توتو خبزه ولاّ ملتوته

الشاطر حسن

 كان يا ما كان عالعذرا صلاة السلام.

: عليها السلام.

كان هالملك اله هالولد الوحداني فش غيره. يوم مات أبوه. أخذ امّه قلّها يمّا بدنا نطلع نشم الهوا في هالبلاد. ركبت هي فرس وهو فرس وطلعوا مشيوا مشيوا لاقوا هالرجال قاعد على مفرق ثلاث طرق.

قلّه يا عمّي، قلّه مالك. قلّه: هذه طريق ايش. قلّه: هذه طريق السّلامه، وهذه طريق الندامة، وهذه طريق تودّي ما تجيب.

قال: أنا بدّي أروح الطريق اللي بتودّي ما تجيب.

يا شاطر حسن منشان الله، منشان النبي، منشان عيسى موسى، قال أبداً، ألا امرق هالطريق هادا.

قلّه بتموت. قلّه: انا وعمري. وينتا ما خلص هالعمر يموت.

دهم بها لطريق لاقالك هالمارد راسه بالسّما، واجريه بالأرض قالّه السلام عليكم.

قلّه: أهلاً، لكن انت مين قالّك تمرق يا شاطر حسن. قلّه: بدّي امرق.

قلّه: الحرب.

قلّه: الحرب.

الشاطر حسن معاه سيف. مسك هالسيف قطّع رجليه الثنتين ورماه.

قلّه: اخ عمر ما واحد غدر علي خذ هاي مفاتيح القصر تاعي انت وامّك بتضل فيه.

قعد في هالقصر وطبعاً الملك شو اله شغل ثاني غير الصيد والقنص. يوم راح يشّم الهوا  قامت امّه حنّت على العبد المارد. جابت هالقطن، وصارت كل يوم تغسل اجريه، وتنّضفهم وتحط عليهم هاليود، لما نشفوا هالاجرين. حبّوا بعض واتجوزا بعض، والشاطر حسن معش خبر، شو بصير ورا ظهره. حبلت، ولدت جابت أول ولد. حبلت ولدت جابت ثاني ولد. قلتله: كيف بدّي اعمل. أن درى فيّ الشاطر حسن راح يقطع راسي.

قلّها: تعالي شايفه هذيك البيّاره المليانه رمّان عمر ما واحد خشّ هاي البيّاره، إلا بتنتّف.

قلتله: بسيطه. جابت حبة هالكركم، سبغت وجهها.

أجا الشاطر حسن: سلامتك يمّا، مالك يمّا، ايش اللي صار لك؟

قلتله: أبداً يمّا، بس انا نفسي قبل ما أموت آكل حبة رمان من هالبيّاره هديك.

قلّها: بسيطه يمّا حطّيلي زاد وزواد يكفيني لهالبلاد.

ركب هالفرس ومشي لمّا وصل لقالك هالشيخ قاعد، قلّه: سلام عليكم.

قلّه: أهلاً، لولا سلامك سبق كلامك، لأكلتك ومرمشت اعظامك، وين رايح يا شاطر حسن.

قلّه: والله يا سيدي الشيخ أنا رايح اجيب رمّان لأمّي.

ضحك، قلّه أنا الّي عشرين سنة، قاعد هون وبستنّى تذوق هالرّمانات، لكن لحد الان فش واحد دخل هالبيّاره، ورجع منها سالم.

قلّه: بفرجها الله.

قلّه: بس يا شاطر حسن ادخل دغري تطلّعش لا يمين ولا شمال، إذا التفت هيك ولا هيك بتموت، قطع وحطّهم في الخرج، وضّل راجع.

قله: خاطر. راح فات ملى الخرج وحط فوقه أخرى ثلاث رمانات زيادة وظل راجع.

أعطى الرمانات لأمه قالت للعبد: انت قلت بموت هيّو راجع مثل القرد.

قلّها: أنا عارف كيف عمل ، عمر ما واحد دخلها ورجع.

قلتله: طّيب يما روح الله يرضى عليك.

ثاني يوم قلّها العبد: شايفه هاى مقثاية البطيخ اللّي بخشّها عمره ما بطلع طّيب. عملت نفس الشي، جابت هالكركم، وسبغت حالها، وقعدت بهالتخت.

: يمّا يا راسي.

قلّها: مالك يمّا.

قلتله: والله يما نفسي بهالبطيخ.

قلّها: بسيطه يمّا، حطّيلي زاد وزوّاد يكفيني لهذيك البلاد.

حطّته، ظّل يجري يجري لمّا وصل. برضه لاقا شيخ موجود على هالباب.

: سلام عليكم يا عمّي الشيخ.

قلّه: لولا سلامك سبق كلامك لنتّفتك وأكلت أعظامك، ايش بدّك؟

قلّه: بدّي بطيخه من هالمقثاه.

قلّه: الي عشره سنه قاعد هون مشفتش حد غدر ياخذ بطيخة كل اللي يخفّو بموتو.

قلّه: الى والهم الله.

قلّه مثل قال هاداك: فوت دوز دغري اذا بلتفت هيك رحت واذا بلتفت هيك رحت.

فات دغري ملّى هالكيس واخذ كمان ثلاث بطيخات للختيار حمل حاله وطلع لحقوه الف اسم الله ما غدروش يمسكوه حمل البطيخات وراح لامه فكره امه تفرح.

قالت للعبد: يي انت قلت يموت هيّو جاب البطيخ واجا زي القرد.

قلّها: ايش عملّك ، ايصر ايش بعمل.

اخذت هالبطيخ واكلته وقلتله يخلف عليك يماّ.

قلّها العبد: ملكيش إلا مية الحياه عمره ما بغدر يجيب ميّة الحياه، بقعد سبع تياّم بسبع ليالي لما يصل هديك البلاد.

: يماّ يا حبيبي اصبعي مجروح بدّو ميّة الحياه لمّا يطيب.

قلّها: آ يمّا اعمليلي زاد وزواد يكفيني لهديك البلاد.

حمل حاله وراح واخذ معه مقص وشفره وريحه وصبونه ممسكّه واواعي نضاف وحمل حاله وراح.

وصل ارض هالغول: سلام عليك يا عمّي الغول.

: اهلا يا شاطر حسن، لولا سلامك سبق كلامك لمرمشتك واكلت اعظامك.

نزل قصقصله رموش عينيه، قصقصله دقنه وشواربه وشعره غسّلّه بهالمّسّكه، حطله هالريّحه، لبّسه هالاواعي  النضاف.

قالّه: يشمّمك الهوا مثل ما شمّمتني الهوا، ايش بدّك يا شاطر حسن؟

قاّله: بدّي اجيب ميّة الحياة لأمي.

قاّله: اسمع ببعثك لاختي اكبر منّي بشهر، وأوعى منّي بدهر. إن لاقيتها بتطّحن سكّر، وردّاه بزازها لورا، قرّب ومصّ من بزّها اليمين، وبعدين من بزّها الشمال. وإن لاقيتها بتطحن ملح وعيونها حمُر حُمر أوعى تقرّب عليها.

قلّه: حاضر راح دغري لقاها بتطحن سكر، وحاطّه ابزّازها ورا ظهرها. مصّ من بزّها اليمين.

قالت: مين اللي مصّ من بزّي اليمين صار أغلى من ابني عبد الرحيم. مصّ من بزّها الشمّال.

 قالت: مين اللي مصّ من بزّي الشمال صار أغلى من ابني عبد الرحمن.

قالتله: انت ارضعت من ابزازي بصرّش أضّرك، بس أولادي احدعشر غيلان ، إن شافوك شو بساووا فيك وين اروح فيك؟

شويّ اجو ولادها بس سمعت صوتّهن نفخت عليه، عملته ابره وحطّته بفسطانها.

أجو ولادها: ريحة انس يمّا، ريحة انس يمّا.

قلتلهم: انس فيكم وفي ذيالكم، منين اجاني الانس.

قالولها: ابدا، ريحة انس.

قالتلهم: ارمو عليه الأمان.

قالولها: هو أخونا بعهد الله والخاين يخونه الله.

رجّعته زي ما هو: أهلاً تعابطوهم ويّاه وبوّسوه (ما هو صار اخوهم).

قالتلّهم: مين بدو يوخذ الشاطر حسن يجيب ميّة الحياه هداك يقول أنا بوخذه بعشر تيّام هداك بتسع تّيام الزغير خالص، قال أنا باخذه وبجيبه بسبع دقايق. حمله عضهره وطار.

: قديش بتشوف من الدنيا.

قلّه: قد الغربال.

: قدّيش بتشوف من الدنيا.

: قد المنخل.

: قدّيش بتشوف من الدنيا.

: قد القرش.

قلّه : خلص انزل.

قالّه : شايف هالبّوابه هديك بتلاقي الباب مايل بتركزه مزبوط، وبعدين بتلاقي هناك كلاب وخيل، قيم اللحمه من قدّام الخيل، وحطّها قدّام  الكلاب وقيم الشعير من قدام الكلاب وحطه قدام الخيل وخذ هذا البريق الفاضي حطّه عالبركه، وجيب بريق ملان، ولا تلتفت لا يمين ولا شمال، وضّلك كاسح دغري، ولّمن تطلع اطرق الباب بعجله.

راح هاذا دوز دغري عمل مثل ما قلّه، ركّز الباب مزبزط، قام اللحمه حطّها للكلاب، وقام الشعير حطّه للخيل، وحطّ هالبريق الفاضي، وحمل هالبريق الملان، ودار ظهره وطلع. صاروا يصيحّوا: امسكو يا باب.

: الي اربعين سنه ما انفتحت.

: امسكوه يا كلاب.

: النا اربعين سنه ما ذقنا اللحمه.

: امسكوه يا خيل.

: النا اربعين سنه ما ذقنا الشعير.

ثمّه شارد توصل هاداك حطّه على أكتافه، وثمّه شارد. وصل عند الغوله: أهلاً الحمد لله على سلامتك.

قالوا: مين يوصلّه عند خاله.

قال: أنا بكمّل معروفي عند خاله.

حطّه عكتافه ووصل على خاله. قالّه: هاي فرسك.

قالّه: آ ودّعوا وركب فرسه وضّل ماشي.

في الطريق وهو مرّوح عند امّه بنت الملك واقفه عالبلكون، شافته قالتله: شاطر حسن ميّل.

قلّها: لأ بدّيش اميّل.

قالتله: وحياة عزيز راسي، ومن ولاّه على أرقاب العباد، إن ماكنت تميّل لأقطع راسك.

ميّل عليها. من شطارتها اخذت ابريق ميّه الحياه، وحطّت بداله ابريق ميّه العادي وغدّته وقلتلّه مع السلامه. وحمل حاله وراح على امّه دغري. دق الباب. لمّا دق الباب قالت: يا خيبتي، هيّه بعده، طّيب يا عبد الخير.

قلّها: والله ماني عارف كيف اجا.

: أهلاً وسهلاً يمّا، الحمد على سلامتك، وبوستّه وأخذت منه هالبريق

: وبعدين شو بدّنا نساوي. 

قلّها العبد: اسأليه وين قوّته.

يوم سألته: يمّا يا شاطر حسن وين قوتّك.

قلّها: في براسي سبع شعرات إذا قصّيتهم بتروح كل قوتّي.

قلتله: يمّا تعال افلّيك. قعدت تفلّيه ، قلعت السبع شعرات، اعطته خيط زغير مقدرش يقطعه.

قلتله: اطلعله يا عبد الخير. اقطع راسه.

طلعله العبد.

: لأ يمّا، أنا ابنك.

قلتله: ابداً، اقطع راسه.

قطع راسه وقلّع عينيه وشقّفوا جثته اربع شقف، وحطوه بهالصندوق ورموه في هالبحر.

ثاني يوم اجو الصّيادين لاقوا هالصندوق قازفه الموج على شط البحر قالوا: والله هادي هدّيه مليحه لبنت الملك. بدنا نهديها لبنت الملك.

حملوه وراحوا لبنت الملك من حدّ ما شافتهم عرفت قالت: آه، خساره عليك يا شاطر حسن. أخذته منهم وأعطتهم عشر دنانير، وقلتلهم مع السلامه. فتحت الصندوق قلتله عملتها امّك . قدّيش نصحتك مردّيتش.

جابت ميّه الحياه وحطّت الاجر عالأجر ودهنتها بقدرة الله لحمت، حطت الأيد، الظهر، الكتاف، أخر اشي حطّت الراس ودهنته، ولاّ هو بعطس.

قلّها: أنا وين.

قلتله بنت الملك: انت عندي يا شاطر حسن.

قلتله: وين عينيك .

قلّها: عينّي قلعوهم قبل ما يذبحوني واخذهم اخويّ الزغير.

قالتله: طيّب.

ضلّت كل يوم تطعمه مرقة زغاليل ، مرقة جاج كل المرقه التقيله تطعمه ايّاها، لصرلك زيّ الجمل.

قلّها: انا بدّي ارجع اقتل العبد.

قلته: كيف بدّك تقتله. بالأول بدّك تروح تجيب عينيك خذ العبده معك، وبعطيك اساور وخواتم ، وبتروح بتعبر تقول: اساور يا بنات، خواتم يا بنات. بطلعو اخوتك يقولولك قدّيش بدّك بتقولهم بدّيش مصاري بدّي عيني اليمين ياللي في ايدي اليمين، وعيني الشمال باللي في ايدي الشمال. راح تحت قصر امّه وصار ينادي. صارت امّه تقول: يا خيبتي والله صوت الشاطر حسن يا عبد الخير.

قلّها: أي وين الشاطر حسن هداك اكله السّمك.

طلعه إخوته: قدّيش بدّك يا عمّي.

قلّهم: هدولا بالايد اليمين بالعين اليمين، وهدول اللي بالايد اليسار بالعين اليسار.

نط اخوه الزغير قال آ والله عينين أخوي بالطاقه لروح اجيبللك ايّاهم. أخذ العينين ورماله كل اللي معه، وقلّه يالله. حمل حاله ورجع. حطّتله هالعينين، رجع أحسن من أوّل ، شّب اكثر من أول. لمّا صار يشوف مليح وصار قويّ، قال لبنت الملك: بدّي اروح اقتّلهم واحد واحد.

قلتله: يا حبيبي، يا روحي. ماتت وهي تترجّى فيه قالّها ابدا. ركب هالفرس وحمل سيفه وراح دغري ودّق الباب.

: مين.

قلّها: انا الشاطر حسن.

قالت: يي يا خيبتي.

قلّها: لمّا ذبحتيني مقلتيش يا خيبتي، انتي قطعتيني اربع شقف والله لاقطّعك نتف نتف.

هاتي اوّل عبد الخير.

حابه، دبحه على ركبتها، وقطّعه نتف نتف ورماه. وجاب الولدين والبنت دبحهم ونتّفهم قدّامها، بعدين قلّها: انتي غير انتّفك تنتيف، انا جبتك على السّاغ والسّلم، وتروحي تخونيني وتوخذي واحد عبد اللي انا قطّعت اجريه.

قطّعها، قطّعها ورماها وهد القصر، واخذ مال هالمارد كلّه وودّاه، لبنت الملك.

يوم الملك قال لبنته: يا بويّ بدكيش تتجوزّي.

قلتله: آيابا بدّي أتجوز، اعلن في البلد بدّي تتجوز.

اعلنوا بنت الملك بدّها تتجوّز صاروا هالوزرا وهالبشوات وهالبكوات يمرقوا من تحت القصر انّها ترمي هالتّفاحه عراس واحد منهم مفش نتيجه.

الشاطر حسن راح لبس كيس ممزّع وجاب كرش الخروف فتحه ولبسه على راسه ومرق من تحت قصر بنت السلطان عرفته ، رمت التفاحه على راسه.

صاروا هالناس: يي عليك، يا ناري يا سخامي، كل وحده بكلمه.

أبوها رفض بدّش يعطيها الّه قالتله ابداً ما باخذ غيره. قلّها إذا بدّك تتجوزيه في بيت الهجران.

قلتله: طّيب.

اتجوّزوا وقعدت هي وايّاه في بيت الهجران .

بعد مدّه اجا حرب على أبوها. لمّا بديت الحرب اخذ في عنده بغله مكّسره، مسخّمه، منيّله، حاحا قدّام هالناس، وهالكل يبزق عليه.

: يلعن أبوك على أبو اللي ناسبك وأعطاك بنته.

لمّا ابعد عن الناس وبطّل حدا يشوفه طال خاتم هالبيك.

قلّه: خاتم لبّيك.

قلّه: عبدك بين ايديك.

قلّ: بدّي فرس خضرا اللي مفش مثلها وسيف مذّهب.

حلا اجت هالفرس الخضرا، وهالبدله الخضرا، وهالسيف المذّهب ونزل عالميدان

: اشخث اشخث، تغابت الشمس، راح الثلث، رجع عالبلد راكب البغله ولابس اواعيه الممزعّات، مين ما مّر يبزق عليه.

ثاني يوم نزل والكل يبزق عليه ويسّب عليه لمّا ابعد عن الناس وما عاد في حدّ يقول لا اله الا الله نزل عن هالبغله.

قال: خاتم لبّيك.

قلّه: سعدك بين ايديك.

قلّه: بدّي فرس حمره وبدله حمره وسيف مذّهب.

نزل في الميدان اشخث اشخث راح الثلث ضلّ ثلث.

حمل حاله وروّح وهالناس بتبزق عليه.

ثالث يوم أخذ هالبغله تعته، ونزل وعندما وصل عالخلا الخالي

 قال: خاتم لبّيك.

قلّه: سعدك بين ايديك.

قلّه: بدّي بدله بيضه وفرس بيضه وسيف السّاحه بين ايديك.

قلّه: طّيب حالاً.

نزل عالسّاحه.

الملك كان سامع بالهالفارس اللي بيجي وبذبح كل يوم ثلث جيش العدو قال والله بدّي اروح اشوف هالفارس اللي يحكو عنّه.

الشاطر حسن نزل عالسّاحه قتل الثلث الباقي، ورجع على داره راكب عالفرس البيضه، لمّا شافوه الناس وعرفوا مين هو اللي كانوا كلهن يبزقو عليه استغربوا، راحوا قالوا للملك: اجا الملك شافه انبغث. قال لبنته هوجوزك ايش اسمه، قالتله: جوزي اسمه الشاطر حسن ابن الملك الفلاني، قلّها: انت اخذتي ابن الملك الفلاني.

قلتله: آ.

أجا بوّسه وقلّه مبروك يا شاطر حسن وقلّه انا يا عمّي متأسف كثير. قام أعلن بالبلد سبع تيّام بسبع ليالي، فرح الشاطر حسن على بنته، وكل البلد توكل، وتشرب سبع تيّام على حساب الملك على شان عرس الشاطر حسن.

وكل سنه وانتم سالمين

حديدون والغولة

الراوي:

   الجنس: انثى.                              إعداد: زياد عبد الله (1403).

   السن: 54.

   البلد: لفتا (سابقاً) – البيره (حالياً).

كان – يا وليداتي – هالزلمه ومرته ميتة وعنده ولدين. الدنيا شتا، قالهن: "يا أولاد روحو هاتوا شوية حطب من الخلا. قالوله: "طيب يابا". راحوا عالخلا وابعدوا وصاروا يلموا الحطب، ولاقوا حطب كثير، والا جاي عليهن هالغوله. قالتلهن: "أهلا، يا أولاد اخوي، يا حبيبيني، مرحبا. وين يا وليدات اخوي؟ وأين أبوكو وأين امكو". قالولها: "يا عمتي، أبونا عمره ما قلنا انه في النا عمّة". قالتلهن: "هو ما في، بس انا عمتكو، تعالوا يا حبيبيني تعالوا، والله ما انتو رايحين ... تعالوا تأحملكوا قناطير حطب، والله ما انتو رايحين غير ما تدفوا وتتغدوا.

أخذت الولاد وراحت عالمغارة. حطت لأولاد وجبتلهن من اللحمة اللي سرقتها. اتغدوا لأولاد. قالتلهن: "والله ياولاد أخوي ما انتو رايحين". قالوا: "بس أبونا بزعل وبضربنا". قالتلهن: "يا عمتي أنا بروح معكو. والله يا عمتي ما انتو مروحين، غير اتظلوا عندي جمعة، وأبوكو بيدّبر حاله". لأولاد مساكين جاهلين، ضحكت على عقلهن، ظلوا عندها وهي تجيب كل يوم من اللحوم اللي تفترسهن، تطعمهن وتربي فيهن منشان تاكلهن في الآخر.

    أبوهن في البلد استطولهن، ودار يدور عليهن ويسأل عنهن الرعيان، ومش لاقيهن. قال والله غير أروح أفتش عليهن في الخلا". صار يمشي في الخلا وينادي، ويدور، واللا هاللي موجهة عليه "أهلاً ياخي ... أهلاً وسهلاً يا خوي ... يا مية مرحبا". يوم شافها عرفها أنها غوله، شرد. هي تجري وراه وهو يجري قدّامها، ادعثرت، التهت في حالها. وهو يجري لاقى قدامه مزرعة بطيخ. كل بطيخة بتسع زلمه. معه شبرية فتح هالبطيخة قوام وفات في وسطها. ما وسعتش مزبوط من العجلة – ظل مبين منه ... لو تدروا شو ظل مبين!! زبرته وذانه. بعدين سكر البطيخة عليه. قامت هذيك (الغوله) فعفلت حاله وقامت تجري ... تجري ... مرقت عن كرم هالبطيخ واللاهالبطيخة مبين منها زبرة وذان. حملت البطيخة والتهت عنه، وروّحت عالمغارة هي تقول: "دان، دان – للبطيخة زبرة وذان". أخذتها عالمغارة عشان تلهي لأولاد فيها. بعدما حطتها قدّام لأولاد، قالت: "وأنا ليش راحت فريستي مني؟ والله غير ارجع أدور عليه". عادت تجري عليه. وهي أبعدت أتدور عليه، تجري في الخلا وتنادي وتصيح، وهو فتح البطيخة وطلع منها .

قالوا "يابا"!! "قالهن: "ابوكو، قوموا قوموا يا قبرتوا ابوكو – بتعاود عليكو بتاكلكو. غولة!! الحقوني، الحقوني يابا" مسك في لولاد وطلعوا عالخلا يجرو يجرو ... تقريب قربوا عالبلد، قامت شافتهن، هي تجري وهن يجرو قدّامها، واللا هالزّفه في البلد، قايمين الأفراح والغناني والدبكة هذول يا حرام هجموا عالناس: "طنبين عليكو خلصونا من هالغوله"، قاموا أهل البلد شردوا، اللي جاب معاه فا ، اللي شبرية، اللي طورية .... اللي بايديهن، وهجموا عالغوله واستقووا عليها وقتلوها.  واتريحوا منها كل البلد.

وتوتو توتو، خلصت الحتوتو ...

" مقطّعة الدّيات "

: صلّو عالنبّي.

: اللهم صلّي عليه.

باكي هالزّلمه مرته مخلّفه بنت وولد وميّته. يوم مات الزلمه وظلّوا الولاد لحالهم. باقي عندهم هالجاجه. باقية هالجاجه اتبيظ كل يوم بيضه يوكلوها هالولاد، يفطروا عليها ويظلوا لثاني يوم.

يوم من الأيام بطّلت هالجاجه تبيظ. قالت البنت في عقلها بدّي اطيح افقد في الخم. طاحت البنت وفتشت بين التبن والقش، إلاّ هي ملاقيه كوم هالبيظ، وتحته لاقت مصاري ابوها كلها باقي أبوها مخّبيها تحت التبن في الخم، لمّن أجا اخوها قالتله: هيّني لقيت قعد الجاجه. ومقالتلش عن المصاري.

طالوا البيظات وصاروا كل يوم يوكلو بيظ.

يوم كبر الولد شوى قالتله اخته: اللي يوّريك مال امّه وأبوه شو بتساوى في المال؟

قالها: بشتري غنم وبقر.

قالت: في عقلها اخويا اسّعانت زغير.

راحت مدّة عاودت قالتله: اللي يوريك مال أمه وأبوه شو بتساوي فيه؟

قالّها بتجّوز.

قالتله: انت يا خوى هالقيت كبير ويتفهم وبّدي اجوّزك.

هيذ هيذ القصّه.

اخذت أخوها وداروا يفرّوا في هالدنيا تلاقوله عروس، ولاّ هّما جايبين على هالبنت ساكنه في هالدار لحالها.

اتجوزها الولد، هالمره حبلت وجابت. أجاها أول شيء بنت، قامت هالمره في الليل، وأكلت بنتها ودّهنت براطيم اخت جوزها ابدم البنت، يوم قاموا الصبح والاّ هي بتقول لجوزها: هي اختك غوله ، وأكلت البنت، تع شو ثمهّا.

راح سأل اخته: ليش توكلي البنت؟

قالتله: والله يا خوي مكلتها.

محكاش الولد ظل ناصت. ثاني سنه جابت ولد. قامت في الليل اكلتا ودهنت ثمّ اختا.

اختشِ من اختا محكاش معاها أقال بعقله: لازم أقتلها. بعد اكمن يوم قال لأخته: يا أختي تعالي اسرح انا وإيّاك.

يوم سرحوا أخذها تحت هالشجره جنب بير وقالّها: هيذ انتي بتسّوى فيّ، ابتوكلي أولادي قالتله: والله يا خوي ما كلتهم أنا.

سحب هالسيف وقطّم ديّاتها وجريّاتها.

دعت عليه قالت: ريتك يخوى تطزعك شوكه في أجرك ما يقدر حد يخلعها.

الله استجاب الها. وهو مرّوح طزعته شوكه في اجره. يوم قرّب على الدّار لاقا مرته بتطارد ورا هالديك بدها توكله، فقهم انها غوله، ظلّ راجع ما استجراش يفوت هالدّار.

نرجع مرجوعنا لاختا. وهي قاعدة على باب البير اللاّهي جايه عليها هالحّيه ابتنفخ وخايفه قالتلها: خبّيني خبتّها تحتها.

بعد شوى ولاّ هو جاي هالحنيش ينفخ ويقول الها: شفتي هالحّيه قالتله: آه، هيّها دبّت في البير. الحنيش دبّ في البير تيحلق الحيّه، عاد الحيّه تحت البنت. طلعت الحيّه من تحت البنت وطّلت عالحنيش وقالتله: طق هيّاني.

طق الحنيش ومات، قامت الحيّه مسحت هيذ ع ايدين البنت ورجعن زي ما هن ، ومسحت ع اجرين البنت، رجعن زي ما هن. بعدين البنت طشت وراحت ولاقت هالزّلمه واتجوزّت وجاها أولاد.

يوم يوم اخوها عاد داير يدوّر ع ناس يخلعوله الشوكه من أجره ومحدا قادر يخلعله الشوكه من أجره ومحدا قادر يخلعله اياها ولاهو اجا عباب دار اخته، وهو مش عارف انها دار اخته. اختا يوم شافته عرفته وهو معرفهاش، عاد أخته وصّت اولادها يوم بيجي هاظا الزلمه اللي يعرج ظّلكم قولولي: خرّفينا يمّا عن الزلمه اللي قطّم ايدين اخته واجريها.

نادت عليه اخته قالتله: مالك يا عمّي؟

قالّها: بجري شوكه ما حد قادر يخلعلي ايّاها، وبدّور على حد يخلعها.

قالتله: اريّني اشوف. قالت في هالدبوس هيذ، والاّ هي الشوكه ناطّه هناك، قام الزّلمه ابوّس دياتها.

قالتله: اقعد اتغذا معانا. قعد يتغذّا صاروا الولاد يقولوا لأمهم: خرفينا ياماّ عن الزّلمه اللي قطّع ديّات أخته واجريّاتها. قعدت المره اتخّرف الخرافيّه لولادها، وفي الآخر قالتلهم:

وأنا اللي اتقطّت ديّاتي واجرياتّي، وهذا الزلمه خالكم. يوم سمع هيذ قاموا واتعابطوا. وطار الطير وتتمسّو بالخير.